Yau kotun soji a Burkina Faso ta fara shari’ar da aka dade ana dako wa mutane 14 da ake zargin su da kashe tsohon shugaban kasa Thomas Sankara shekaru 34 da suka gabata.
Daga cikin wadanda ake tuhuma harda tsohon shugaban kasa Blaise Compaore da na hannun daman sa Janar Gilbert Diendere.
A ranar 15 ga watan Oktobar shekarar 1987 wasu bijirarun sojoji suka budewa shugaba Sankara da wasu jami’an sa 12 wuta a juyin mulkin da ya baiwa Blaise Compaore damar hawa karagar mulki.
Bayan kashe Sankara, Compaore ya kwashe shekaru 27 yana jagorancin Burkina Faso kafin boren da ya tilasta masa tserwa daga kasar a shekarar 2014 inda yayi gudun hijira zuwa Cote d’Ivoire wadda ta bashi takardar zama ‘dan kasa.
Janar Diendere dake cikin wadanda ake tuhuma yanzu haka na zaman gidan yari akan daurin shekaru 20 da aka masa saboda yunkurin juyin mulkin a shekarar 2015, kuma yau ya bayyana a gaban kotun sojin cikin damara.
Wani fitaccen jigo da ake tuhuma a shari’ar shine Hyacinthe Kafando, wanda tsohon jami’i ne a rundunar tsaron fadar shugaban kasa, amma a halin yanzu ya gudu.
Compaore ya dade yana watsi da zargin da ake masa na kashe abokin sa Sankara a juyin mulkin, yayin da lauyoyin sa suka ce ba zai gurfana a gaban kotun ba, saboda yana da kariyar tsohon shugaban kasa.
Duniya ta zuba ido ta ga yadda wannan shari’a zata kaya, musamman ‘yan Afirka dake juyayin kashe shugaban da ake yiwa kallon jagora na gari lokacin mulkin sa.
A wani labarin na daban hukumomin Burkina Faso sun yanke hukuncin gurfanar da tsohon shugaban kasar Blaise Compaore a gaban kotu saboda zargin da ake masa na kashe wanda ya gada shugaba Thomas Sankara a juyin mulkin da ya masa cikin shekarar 1987.
Kam ya ce ana tuhumar Compaore da wasu mutane 13 da laifin cin amanar kasa wadda ta kaiga kisa da kuma kitsa kisan da kuma boye gawarwaki.
Lauyan ya ce lokaci ya yi na tabbatar da gaskiya, kuma ana iya fara shari’ar wadda yanzu haka ake dakon mai gabatar da kara na soji ya sanya ranar fara ta.
Cikin wadanda ake zargi har da Janar Gilbert Diendere, wani tsohon na hannun daman Compaore kuma tsohon kwamandan dakarun da ke tsaron fadar shugaban kasa lokacin da aka yi juyin mulkin, wanda yanzu haka ya ke cin sarkar shekaru 20 saboda kitsa juyin mulkin da soji suka yi a shekarar 2015.
Lauyan ya ce daga cikin wadanda ake tuhuma wasu sun riga sun mutu, yayin da lauyan Diendere, Mathieu Some ya ce duk da ya ke ba a sanya ranar fara shai’ar ba, ana iya fara ta a kowanne lokaci.
Tsohon shugaban kasa Thomas Sankara ya gudanar da juyin mulki a shekarar 1983 amma sai aka kasha shi a ranar 15 ga watan Oktobar shekarar 1987 lokacin yana da shekaru 37 a juyin mulkin da Compaore ya jagoranta kafin shima a kifar da gwamnatin sa a shekarar 2014 bayan ya kwashe shekaru 27 a karagar mulki.
A watan Maris na shekarar 2016 kotu ta bada sammacin kamo shi a Cote d’Ivoire inda ya samu mafaka tun bayan kifar da gwamnatin sa.
