A yau Alhamis ne shugaban kasa Muhammadu Buhari zai ziyarci Maiduguri, babban birnin jihar Borno domin kaddamar da sabuwar tashar samar da wutar lantarki mai amfani da iskar gas ta Maiduguri mai karfin megawat 50.
Tashar lantarkin wacce kamfanin man fetur na kasa (NNPCL) ya gina, za ta samar da wutar lantarki megawatt 50 ga birnin Maiduguri da kewayen garin.
Babban birnin jihar ya fuskanci kalubalen rashin wutar lantarki irin wacce ba a taba ganin irinta ba a yankin sakamakon lalata tasoshin samar da wutar lantarkin da ‘yan ta’addar Boko Haram suka yi, sama da shekara daya.
Daga bisani kuma, shugaban a yayin ziyarar zai gana da jajantawa wadanda bala’in gobarar Kasuwar Monday ta Maiduguri ta shafa.
A ranar Lahadin da ta gabata ne wata gobara ta tashi a kasuwar Monday a Maiduguri, inda ta kone kasuwar baki daya. Gobarar ta lalata shaguna da kayayyaki na biliyoyin Naira.
A wani labarin an daban dama dai Gwamna Babagana Zulum na Jihar Borno, ya kafa wani babban kwamitin bincike mai mambobi 24 kan gobarar da ta tashi a kasuwar Monday Market a ranar Litinin a Maiduguri.
Kamfanin dillancin labarai (NAN) ya rawaito cewa wata gobara mai ban mamaki ta kone gaba daya rukunin kasuwar a ranar Lahadi.
Hakan na kunshe ne cikin wata sanarwa da sakataren gwamnatin jihar, Alhaji Usman Shuwa ya fitar a ranar Talata.
Shuwa ya ce kwamitin kuma zai dauki nauyin bayar da agajin gaggawa ga wadanda gobarar ta shafa.
Ya ce sharuddan kwamitin sun hada da tantance musabbabin aukuwar gobarar nan take, domin tantancewa da kuma tabbatar da ko akwai wasu mutane na musamman da ke da alhakin faruwar lamarin kai tsaye ko a fakaice.
Haka kuma za ta tantance ainihin adadin mutanen da suka yi asara tare da tabbatar da adadin dukiyoyin da kowane daya daga cikin mutanen da suka rasa a sanadiyyar gobarar.
Kwamitin yana da Injiniya Zarami Dungus a matsayin Shugaba, yayin da Sakataren Kasuwar Monday Market zai kasance Sakataren Kwamitin.
Kamfanin Dillancin Labarai (NAN), ya ruwaito cewa, gwamnatin Jihar Borno ta fitar da Naira biliyan daya a matsayin tallafi ga wadanda abin ya shafa.
Zababben mataimakin shugaban kasa, Kashim Shettima da shugaban manyan makarantu (Tetfund), Kashim Ibrahim sun bayar da gudunmuwar Naira miliyan 100 kowanne.
NAN ya ruwaito cewa kasuwar ta kafu ne kimanin shekaru 35 da suka gabata yayin da kasuwar ta kasance mafi girma a yankin Arewa maso Gabas kuma jigon tattalin arzikin Borno.
Source:LeadershipHausa
