Wasu daga cikin ministoci da mataimakan shugaban ƙasa Muhammadu Buhari sun kamu da cutar corona.
Cikin waɗanda suka kamu da cutar sun haɗa da ministan yaɗa labarai da raya al’adu Alhaji Lai Muhammad da babban sakataren fadar shugaban ƙasa Tijjani Umar.
Sai Yusuf Dodo da babban jami’in tsaronsa Aliyu Musa sai kuma mai taimaka masa kan kafofin yaɗa labarai Malam Garba Shehu.
Jaridar Premium Times ta rawaito cewa bayan yi musu gwajin corona sakamakon ya tabbatar da sun kamu da kwayar cutar.
Sai dai ana tsammanin cutar bata yi musu tsanani ba kasancewar sun karɓi cikakkiyar allurar rigakafin cutar Corona.
Idan dai za a iya tunawa, a kwanakin baya ne uwargidan shugaban ƙasa HajiyaA’isha Muhammadu Buhari da maigidanta suka dawo daga birnin Istanbul na ƙasar Turkiya, inda kuma ta ba da umarnin rufe ofishinta tare da umurtar ma’aikatanta da su zauna a gida na wani lokaci.
