Mali Ta Amince A Kai Mata Dakarun Kiyaye Zaman Lafiya Daga Chadi

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Mali ta amince ta karbi dakarun kiyaye zaman lafiya na majalisar dinkin duniya guda dubu 1 daga Chadi, biyo bayan matakin Faransa na rage nata sojojin a kasar da yaki ya daidaita.

Kamfanin dillancin labaran Faransa ya ruwaito cewa jakadan majalisar dinkin duniya ya shaida wa kwamitin tsaron majlisar cewa gwamnatin Mali ta amince da a tura karin sojojin ne don ci gaba da gudanar da aikin kiyaye zaman lafiya da aka wa lakabi da MINUSMA.

Wannan yarjejeniyar na zuwa ne a daidai lokacin da Faransa ke rage dakarunta a kasar mai yawan al’umma miliyan 19, bayan da ta shiga don taimakawa wajen yakar ta’addanci a shekarar 20213.

A watan Yuni ne shugaba Emmanuel Macron na Faransa ya sanar da matakin rage dakarun kasarsa a Mali, bayan da sojoji suka hambarar da gwamnatin Ibrahim Boubacar Keita a watan Agustan 2020.

A wani labarin na daban kuma hukumar kare hakkin dan Adam ta Majalisar Dinkin Duniya ta amince da tura tawagar masu bincike zuwa kasar Habasha mai fama da rikici, a daidai lokacin da masu bibiyar lamurra a kasar ke gargadin yiwuwar kazancewar lamurra kowane lokaci daga yanzu.

Matakin tura tawagar masu binciken na kasa da kasa, ya biyo bayan wani taron gaggawa da kwamitin kare hakkin bil adama na Majalisar Dinkin Duniya mai wakilai 47 yayi, inda ya kada kuri’ar amincewa da kudurin da karamin rinjaye, domin gudanar da bincike kan laifuka da dama da ake zargin bangarorin dake rikici da juna da aikatawa a kasar Habasha tsawon watanni 13.

Tuni dai kasar Habasha ta yi kakkausan suka kan zaman da kuma kudurin hukumar ta kare hakkin dan adam, inda jakadanta Ambasada Zenebe Kebede ya ce ana amfani da ita ne a matsayin wani makami na matsin lambar na siyasa, da kuma wani sabon salon a mulkin mallaka a zamanance.

Tags: amince domin jami'an tsaro kawo mali