‘Yan bindiga a Najeriya sun hallaka akalla mutane 24 a wasu jerin hare hare da suka kai Jihohin Zamfara da Katsina dake fama da matsalar tsaro.
Kakakin ‘yan sandar Jihar Katsina Gambo Isah ya ce wasu ‘yan bindigar sun kai hari kauyen Yasore da ke Batsari inda suka hallaka mutane.
Jihohin Zamfara da Katsina na daga cikin yankunan da ‘yan bindiga suka fi kai munanan hare hare a yankin arewa maso yammacin Najeriya.
A wani labarin na daban, mahaifin kakakin Majalisar jihar Zamfara Nasiru Muazu Magarya, ya rasu a hannun ‘yan bindiga dake garkuwa da shi sakamakon bugun zuciya.
Makonnin takwas da suka gabata aka yi garkuwa da Abubakar tare da mai dakinsa dauke da jariri mai makonni uku, da Malam Magarya da kuma wasu mutum biyu.
Kogi
A wani labarin kuma, tsohon shugaban Kwalejin Ilimi ta Jihar Kogi da ke Kabba, Julius Oshadumo, wanda ‘yan bindiga suka yi garkuwa da shi makwanni biyu da suka gabata, ya mutu a rikicin da ya barke tsakanin masu garkuwa da shi da jami’an tsaro, yayin da ake kokarin aikin ceton sa.
An yi garkuwa da jimi’in ne makonni biyu da suka gabata lokacin da wasu ‘yan bindiga dauke da makamai suka kai hari kan cocin ECWA da ke yankin Okedayo a Kabba ta Jihar Kogi, inda aka kashe mutum daya sannan aka raunata wasu masu ibada.
