Hadaddiyar Daular Larabawa (UAE) ta mayar da martani da bacin rai a ranar Litinin bayan da aka kai hari a gidan jakadan kasar Sudan da ke fama da yakin basasa tare da lalata musu mummuna.
Ƙasar (UAE) Gulf mai arzikin man fetur, wadda ta sha musanta zargin da ake yi mata na hannu a yaƙin, ta zargi dakarun Sudan da kai wannan mummunan hari.
Rundunar sojin Sudan ta musanta kai harin, tana mai nanata cewa ba ta kai hari kan ofisoshin diflomasiyya ba.
Sojojin na zargin UAE da goyon bayan rundunar Rapid Support Forces (RSF), wadda take fafatawa tun a watan Afrilun 2023 a yakin da ya kashe dubun-dubatar mutane tare da haifar da mummunan rikicin bil adama.
Kamfanin dillancin labaran iqna ya habarta cewa, ya nakalto daga shafin sadarwa na yanar gizo na WAM cewa, Hadaddiyar Daular Larabawa ta yi kakkausar suka kan harin da wani jirgin yakin Sudan ya kai kan gidan shugaban tawagar Hadaddiyar Daular Larabawa a birnin Khartoum, wanda ya yi sanadin lalata ginin.
Ta kara da cewa ” Hadaddiyar Daular Larabawa ta yi kira ga sojojin kasar da su dauki cikakken alhakin wannan aika-aika na matsorata,” in ji ta, tana mai bayyana hakan a matsayin “ketare ka’idar rashin cin zarafin wuraren diflomasiyya”.
Duba nan:
- Janar na sojojin Sudan ya ziyarci wani muhimmin filin daga
- Ta yaya Sayyid Hassan Nasrallah ya zama shugaban Hizbullah?
- UAE condemns ‘heinous’ attack on ambassador’s home in Sudan
Rundunar sojin Sudan ta mayar da martani da cewa, tana Allah wadai da musanta zargin da Hadaddiyar Daular Larabawa ta yi, inda ta kara da cewa “ba ta kai hari kan hedkwatar ofisoshin diflomasiyya, hukumomin Majalisar Dinkin Duniya ko kungiyoyin sa kai ba, kuma ba ta mayar da su sansanin soji da wawashe dukiyarsu”.
Sanarwar ta ce, “Wanda ke aiwatar da wadannan munanan ayyuka da matsorata, shi ne ‘yan ta’adda, ‘yan tawaye (RSF)…da ke goyon bayan aikata wannan duka da kasashen duniya suka sani.”
A cewar shaidun gani da ido a Khartoum, an gwabza kazamin fada a sassa da dama na babban birnin kasar tsawon kwanaki hudu da suka gabata, a wani kazamin fada da aka yi.
A watan Yuni, jakadan Sudan a Majalisar Dinkin Duniya Al-Harith Idriss al-Harith Mohamed ya zargi Abu Dhabi da bayar da tallafin kudi da na soji ga kungiyar RSF, yana mai cewa “babban dalilin da ya sa wannan yaki ya dade”.
Hadaddiyar Daular Larabawa ta musanta zargin cewa tana goyon bayan kungiyar RSF a matsayin “karyata bayanai”, tana mai cewa kokarinta na mayar da hankali ne kawai kan kawar da tashin hankali da kuma rage radadin jin kai da Sudan ke fuskanta.
sannan Siriya ta bayyana Allah wadai da harin da aka kai gidan jakadan Hadaddiyar Daular Larabawa (UAE) a kasar Sudan, inda ta yi kira da a mutunta harabar ofisoshin jakadanci kamar yadda yarjejeniyar Vienna kan huldar diflomasiyya ta yi.
“Ma’aikatar harkokin waje da ‘yan gudun hijira ta Jamhuriyar Larabawa ta Siriya ta bayyana Allah wadai da harin da aka kaiwa hedkwatar Jakadan Hadaddiyar Daular Larabawa a Jamhuriyar Sudan tare da yin kira ga dukkan bangarorin da su mutunta tanade-tanaden yarjejeniyar Vienna kan huldar diflomasiyya ta 1961, wanda ke jaddada ba da kariya ga jami’an diflomasiyya, da mutunta tsarkin hedkwatar ofisoshin jakadanci da kuma tabbatar da tsaronsu,” in ji ma’aikatar harkokin waje da ‘yan kasashen waje a cikin wata sanarwa.
