Dan takarar shugaban kasa na jam’iyyar LP a zaben 2023, Peter Obi, ya sanya kafa ya shure hukuncin da kotun sauraron kararrakin zaben shugaban kasa (PEPC), ta yanke da ta tabbatar wa Bola Ahmed Tinubu na jam’iyyar APC nasararsa.
Kotun dai a ranar Labara ta ce Tinubu ya lashe zaben sa na ranar 25 ga watan Fabrairu.
Obi a wani taron manema labarai da ya gudanar a ranar Alhamis kasa da ‘yan awanni bayan da takwaransa na jam’iyyar PDP, Atiku Abubakar ya sanar da irin wannan matsayar.
LEADERSHIP ta labarto cewa tsohon mataimakin shugaban kasa Atiku Abubakar a taron manema labarai a ranar Alhamis da jam’iyyarsa ta PDP sun ki amincewa da amsar hukuncin da PEPC ta yanke da ke tabbatar da nasarar Tinubu a babban zaben 2023.
Idan za ku tuna a ranar Labara kotun ta yanke hukuncin kan kararrakin da PDP, LP da Allied Peoples Movement (APM) da ‘yan takararsu suka shigar a gabanta suna kalubalantar nasarar Tinubu da APC.
Obi, a taron manema labarai a Abuja ya ce tunin ya umarci Lauyoyinsa da su daukaka kara kan hukuncin PEPC zuwa kotun Koli kamar yadda kundun tsarin mulkin kasa na 1999 (da aka yi wa kwaskwarima) suka tanadar.
Shi ma Atiku Abubakar ta tabbatar da cewa tunin ya ce wa Lauyoyinsa su gaggauta su kuma hanzarta tafiya kotun Koli domin nuna rashin gamsuwa da hukuncin na kotun sauraron kararrakin zaben.
Atiku da Obi sun ce hukuncin cike yake da kurakurai don haka ba su aminta da shi ba.
A wani labarin kuma a halin da ake ciki, tsohon Shugaban Kasa Muhammadu Buhari ya ya nuna farin cikinsa da hukuncin kotun wanda ya tabbatar da nasarar APC Da Tinubu da Mataimakinsa Kashin Shettima, yana mai bayyana cewa dimokuradiyya ce ta yi nasara.
Ya ce Kotun ta kafa tarihi bisa yadda ta yi watsi da barazana da ce-ce-ku-cen da aka yi ta yi mata game da kararrakin zaben na shugaban kasa tare da yanke hukunci bisa doka kan zabin da ‘yan kasa suka yi.
“Idan akwai wanda ya yi nasara ma a yau, to demokuradiyya ce da kuma ‘Yan Nijeriya,” yana mai karawa da cewa, “bisa hukuncin da kotun ta yanke, yanzu magana ta kare, lokaci ne da za a manta da duk wasu abubuwa da suka faru a baya.
“Daga nan, ya kamata gwamnatin APC bisa jagorancin Asiwaju Bola Tinubu ta nemi goyon bayan kowa da kowa domin ta samu damar cika alkawuran da ta yi wa jama’a.” In ji shi.
Har ila yau, tsohon shugaban kasar ya yi godiya ga dukkan ‘yan kasa bisa zaman lumana da suka nuna a wa’adin mulkinsa tare da addu’ar kara samun ci gaba mai dorewa a karkashin gwamnatin APC.
Ya aike da sakon taya murna ga shugaban kasa da mataimakinsa da kuma Jam’iyyar APC bisa samun nasarar da suka yi a kotu tare da yi musu fatan cimma muradun al’umma.
Source: LEADERSHIPHAUSA
