Mali Sun Gudanar Da Zanga-Zangar Goyan Bayan Sojoji

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Daruruwan ‘Yan kasar Mali sun gudanar da zanga zanga a Bamako domin bukatar baiwa sojojin da suka yi juyin mulki karin lokaci dan shatawa kasar hanyar komawa tafarkin dimokiradiya.

Zanga zangar na zuwa ne bayan da kungiyar ECOWAS tace har yanzu yarjejeniyar da suka kulla da shugabannin sojin na mayar da gwamnatin farar hula a watan Fabarairu mai zuwa na nan daram.

Kungiyar ECOWAS ta cire takunkumin da ta dorawa kasar Mali sakamakon juyin mulkin da akayi a watan Agustan bara sakamakon kafa gwamnatin rikon kwarya ta farar hula da akayi.

Kasar dake fama da rikicin Yan ta‘adda ta sake fadawa cikin rikicin siyasa abinda ya kaiga samun juyin mulki karo na biyu a watan mayu na wannan shekarar, abinda ya baiwa Kanar Assimi Goita damar zama shugaban kasa.

Goita yayi alkawarin mutunta alkawarin da gwamnatin rikon kwaryar kasar tayi na shirin gudanar da zabe domin kafa gwamnatin farar hula a watan Fabarairun shekara mai zuwa, amma shirin zabe na cike da shakku daga kungiyar ECOWAS.

Daya daga cikin masu shirya zanga zangar, Moulaye Yaffa yace suna bukatar baiwa sojojin shekaru 3 domin daidaita al’amura a cikin kasar.a yaki da ‘yan ta’adda.

A wani labarin na daban ma’aikatar tsaron Mali ta tabbatar da kisan da ‘yan bindiga suka yiwa Sojin kasar 5 a wani farmaki kansu jiya Lahadi.

Sanarwar da ma’aikatar tsaron ta fitar ta ce tawagar dakarun Sojin kasar da ke sintiri a Macina sun mayar da martani kan wani farmakin ‘yan ta’adda da tsakar ranar jiya lahadi wanda ya kai ga kisan Sojin 5.

Sanarwar ta bayyana cewa, dakarun suma sun yi nasarar hallaka mayakan ta’addancin 3 tare da kone motar su ko da ya ke suma sojin sun yi asarar motocinsu guda 5.

Sa’o’I kalilan bayan sanarwar Ma’aikatar tsaron ta Mali ita rundunar Majalisar dinkin duniya da ke aikin wanzar da zaman lafiya a kasar MINUSMA ta sanar da jikkatar dakarunta 3 wadanda ta ce sun samu rauni ne bayan taka wani abin fashewa gab da sansaninsu da ke Kidal.

Yankin arewa maso gabashin Mali na ci gaba da fuskantar hare-haren ta’addanci tun bayan yunkurin mayaka masu ikirarin jihadi a shekarar 2012 da ke neman ‘yancin kansu.

Zuwa yanzu dubunnan fararen hula suka rasa rayukansu galibi mata da kananan yara yayinda dakarun Soji dubunnai suka kwanta dama a yaki da mayakan masu ikirarin jihadi da suka mamaye arewacin kasar.