Putin; Rasha Za Ta Ragargaza Makaman Turawa Masu Cin Dogon Zango A Cikin Ukraine.
Shugaban kasar Rasha Vladimir Putin ya yi gargadin cewa idan Kyiv ta samu makamai masu linzami masu cin dogon zango, Rasha za ta ragargaza su.
Shugaban kasar Rasha Vladimir Putin ya yi gargadi kan baiwa Kyiv makamai masu linzami masu cin dogon zango, bayan da kasashen yammacin duniya da Amurka suka yi ta tattaunawa a baya-bayan nan game da aniyarsu ta baiwa Kyiv makamai masu cin dogon zango, domin yaki da Rasha, wanda tabbas zai iya kai yakin Ukraine a wani mataki mai hadari.
Shugaba Putin ya ce: “Idan Kyiv ta samu makamai masu linzami masu cin dogon zango, Rasha za ta dauki mataki tare da kai hare-hare kan wuraren da ba ta kai hari a baya ba.
Muhawarar karin makaman da kasashen yammacin Turai ke kaiwa Ukraine na da manufa guda daya kawai, wato tsawaita rikicin Ukraine, inji Putin.
Putin ya yi la’akari da cewa samar da na’urorin harba makami mai linzami na Amurka zuwa Ukraine ba zai canza komai ba, saboda Kyiv na da makamai masu linzami iri daya, kuma sabbin kayayyakin ba komai ba ne illa diyya ga asarar da aka yi.
