Mutane A Mali Na Zanga-Zangar Goyon Bayan Dauko Sojin Hayar Rasha

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Daruruwan mutane ne suka shiga wata zanga zanga a Bamako babban birnin kasar Mali domin bayyana goyan bayan su akan shirin gwamnatin Sojin kasar na dauko sojojin haya daga Rasha domin yaki da Yan ta’adda.

Zanga zangar da mutane a kasar suka soma ta biyo bayan ziyarar da ministar tsaron Faransa Florence Parly ta kai Mali inda ta gargadi shugabannin kasar cewar kulla yarjejeniya da Rasha zai sa Faransa da Turai da Majalisar Dinkin Duniya su juyawa kasar baya.

Rahotanni sun ce mutane masu zanga zangar na daga cikin magoya bayan sojojin da suka gudanar da juyin mulki a kasar ne.

Sai dai duk da gargadin na Faransa alamu na nuna cewa Sojin na Mali na shirin kawar da kai wajen dakko sojojin hayar na kamfanin Wagner daga Rasha don taimaka mata a yaki da ‘yan ta’addan da suka addabi kasar.

Sojin hayar na Wagner dai sun taimaka a yakin kasashe irinsu Syria da Libya yayinda yanzu haka suke taimakawa a yakin da jamhuriyyar Afrika ta tsakiya ke yi da ‘yan tawaye.

A wani labarin na daban daruruwan mutane sun yi zanga -zanga a Bamako babban birnin Mali, inda suka bukaci a ba wa shugabannin sojan kasar karin lokaci don tsara zaben da zai sake mayar da mulki ga farar hula.

Zanga-zangar ta zo ne bayan da a ranar Alhamis, kungiyar kasashen Afirka ta Yamma ECOWAS ta ce ba za a sauya jadawalin mika wa farar hula mulki a watan Fabarairu ba.

Bayan juyin mulkin da sojoji suka yi wa tsohon shugaban Mali Ibrahim Boubacar Keita a watan Agustan shekarar 2020, sun nada gwamnatin farar hula ta wucin gadi da aka dorawa alhakin mayar da kasar kan mulkin dimokaradiyya.

Sai dai a watan Mayu sojojin a karkashin Kanal Assimi Goita suka sake kwace mulki gami da ayyana shi a matsayin shugaban rikon kwarya.

Goita ya yi alkawarin mutunta wa’adin na shirya zaben na watan Fabrairu, to amma wasu na shakku game da hakan.