Harin Ta'addanci Ya Hallaka Sojoji 6 Tare Da Jikkata Wasu 3 A Tillaberi

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Gwamnan jihar Tillaberi a jamhuriyyar Nijar Tidjani Ibrahim Katiella ya tabbatar da wani harin kan tawagar motocin shugaban yankin Bankilare da ya hallaka dakarun Soji 6 baya ga jikkata wasu 3 a yankin wanda ke iyakar kasar da Burkina Faso.

Da ya ke shaidawa kamfanin dillancin labaran Faransa, faruwar harin, Gwamna Katiella ya ce mayaka masu ikirarin jihadi sun farmaki tawagar motocin shugaban ne lokacin da ya ke balaguro ko da ya ke ya tsira da kyar bayan tarwatsa tawagar tasa.

Wannan dai ne karon farko da harin mayakan masu ikirarin jihadi ke shafar shugabannin yankin sabanin a baya da sukan farmaki iyakar fararen hula da jami’an tsaro.

Bayanai sun ce dakarun da suka rasa rayukansu a farmakin jami’an tsaro ne na national guard da ke aikin bayar da tsaro ga shugabanni, da manyan ‘yan siyasa a sassan kasar.

Yankin Bankilare da ke da iyaka da kasashe 2 masu fama da hare-haren ta’addanci wato Burkina Faso da Mali shi ne yankin da yafi fuskantar hare-haren kungiyoyi masu ikirarin jihadi yanzu a jamhuriyyar Nijar.

Ko a litinin din da ta gabata sai da harin mayakan masu ikirarin jihari ya hallaka ‘yan sanda 3 tare da jikkata wasu 7 bayan wani farmaki kansu cikin dare a shingen bincikensu da ke Petelkole.