Girgizar Kasa Mai Karfin Maki 5.2 Ta Afkawa Wani Yanki Na Iran

Man fetur ya fado bayan harin da Isra’ila ta kai wa Iran

‘Yan Kenya 5,000 ne ke zaune a matsayin ‘yan gudun hijira a Qatar

Girgizar kasa mai karfin maki 5.2 ta afkawa yankin arewa maso gabashin Iran a safiyar yau litinin, ko da ya ke zuwa yanzu babu cikakken bayani kan alkaluman mutanen da suka jikkata ko kuma barnar da girgizar kasar ta yiwa yankin.

Mahukuntan Iran sun ce da misalin karfe 8:32 na safiyar yau ne lamarin ya afkawa wani yanki da ke gab da birnin Quchan a lardin Razavi Khorasan wadda ya mamayi wurin da fadinsa ya kai kilomita 6.

A cewar Mahukuntan girgizar kasar ta shafi wani yanki na babban birnin lardin Mashhad da ke gab da iyakar Iran da Turkmenistan, birnin na biyu mafi girma a kasar.

Kungiyar agaji ta Red Cresent ta ce jami’an ta na cikin shirin ko ta kwana don tunkarar duk wani kalubale da girgizar kasar ka iya haifarwa a yankin.

A wani labarin na daban hukumomin kasar Haiti sun ce adadin mutanen da girgizar kasar da aka samu makon jiya ta kashe ya karu zuwa dubu 2 da 207.

Hukumar bada agajin gaggawar kasar ta ce an gano wasu sabbin gawarwaki a kudancin kasar, yayin da har yanzu ake neman mutane 344 da suka bata kuma har yanzu ba a ji duriyar su ba.

Gwamnatin Haiti ta ce akalla mutane dubu 600 girgizar kasar ta makon jiya ta shafa.

Wata sabuwar barazana kuma da ma’aikatan agaji ke fuskanta a ita ce harin da gungun mutane zauna gari banza ke kai musu, abinda ya haifar da cikas ga aikin raba kayan agaji ga wadanda suka tsira daga iftila’in girgizar kasar.