‘Yan bindiga sun sace wasu Fulani makiyaya ‘yan kungiyar Miyatti A guda 10 a jihar Anambra tare da shanunsu 300.
Shugaban kungiyar ta Miyetti A na yankin Kudu maso Gabas, Alhaji Gidado Siddiki ya tabbatar da faruwar lamarin.
Siddiki, ya ce lamarin ya faru ne a unguwar Obene da ke karamar hukumar Ogbaru a unguwar makiyayan a lokacin da suke barci, da misalin karfe 1:30 na daren wayewar garin yau Asabar.
A wani labarin na daban Fargaba ta mamaye mazauna yankin kudu maso gabashin Najeriya sakamakon jerin hare haren da ake zargin mayakan haramtacciyar kungiyar IPOB ke kai wa jami’an tsaro wanda ya yi sanadiyar kashe ‘yan sanda 127 a cikin wannan shekara.
Wannan ya sa jami’an ‘yan sandan da ke yankin basa iya sanya kayan Sarki domin zuwa wurin aikin su, yayin da yan bindigar dauke da makamai ke bin su har zuwa ofisoshin su suna kai musu hari.
Yayin da wasu ke danganta hare haren da shirin zaben shekarar 2023 da za’ayi domin maye gurbin shugaban kasa Muhammadu Buhari wasu na danganta shi da masu aikata laifuffuka dake fakewa da sunan masu fafutukar kafa kasar Biafra.
Akalla tashohin Yan Sanda 5 dauke da kayan aiki aka bankawa wuta a yankin, abinda ke jefa fargaba dangane da shirin zaben mai zuwa.
Ita dai kungiyar IPOB ta nesanta kan ta daga wadannan hare hare da suka haifar da rasa rayuka da kuma asarar tarin dukiya.
Wannan yankin yayi asarar akalla mutane miliyan guda lokacin da aka kwashe watanni 30 ana fafata yakin basasan da ya fara daga watan Yulin shekarar 1967 lokacin da shugaban Yan aware Emeka Odumegwu-Ojukwu ya bayyana ballewar sa daga Najeriya.
Shugaban rundunar Yan Sandan Najeriya Usman Baba yace sun kama mutane akalla 600 da ake zargin suna da hannu wajen kai hare haren tare da kwace tarin makamai.
