Sojojin Mali 16 Sun Mutu A Harin Mayaka Masu Ikirarin Jihadi

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Hukumomi a Mali sun tabbatar da mutuwar sojojin kasar 16 baya ga raunatar wasu 10 bayan da motar tawagar Sojin ta taka nakiyar gefen hanya a yankin tsakiyar kasar mai fama da hare-haren kungiyoyi masu ikirarin jihadi da kuma ‘yan bindiga a gefe guda.

Sanarwar da ma’aikatar sojojin ta Mali ta fitar, ta ce, bayan da motar ta taka nakiyar, ‘yan bindigar da suka dasa ta sun kuma budewa motar sojojin wuta, abinda ya kai ga musayar wuta da kuma kashe tarin muatne tsakanin bangarorin biyu.

Sanarwar ta ci gaba da cewa, sojojin a bangarensu sun hallaka maharan 5 yayin musayar wutar.

Kasar Mali na ci gaba da fama da matsalar mayaka masu ikirarin jihadi da kuma ‘yan bindiga tun bayan barkewar rikicin shekarar 2012, bayan da masu ikirarin jihadin suka yi yunkurin kwace iko da mulkin kasar.

Rikicin na Mali zuwa yanzu ya hallaka mutane fiye da dubu 500 baya ga tilasta miliyoyi kaura daga yankunansu don tsira da rayukansu.

Ka zalika yanzu haka wasu sassa na kasar ta Mali na karkashin ikon mayaka masu ikirarin jihadi musamman daga gabashi.

A wani labarin na daban wani jirgin saman daukar kaya ya isa Mali da jirage masu saukar ungulu 4 da wasu makamai daga Rasha, kamar yadda ministan tsaron kasar, Sadio Camara ya bayyana.

Ya ce a watan disambar shekarar 2020 ne Mali ta sayi jirgin a wata yarjejeniyar da ta kula da Rasha ta taimakon dakarunta d ke kokarin yaki da ta’addanci a kasar.

Wadannan kayayyaki sun isa Mali ne a daidai lokacin da dangantaka tsakanin kasar da Faransa, wadda ke taimaka mata wajen yakar ta’addanci ke ci gaba da yin tsami, bisa rahotanin cewa Mali na shirin daukar sojojin haya daga Rasha.