Shugaba Bola Ahmed Tinubu ya bai wa ministan kudi, Wale Edun wa’adin sa’oi 48 domin gabatar masa da sabon tsarin mafi karancin albashin ma’aikata zai ci domin nazari da kuma daukar mataki a kai.
Ministan yada labarai, Mohammed Idris ne, ya sanar da umarnin bayan wata ganawar da shugaba Tinubu ya yi da kwamitin da ke tattaunawa da NLC, jim kadan bayan dakatar da yajin aikin da suka fara a ranar Litinin.
Idris, ya bayyana cewar bangarorin biyu, wato na gwamnati da kuma shugabannin kwadago za su ci gaba da ganawa a tsakaninsu domin cimma yarjejeniya a kan sabon tsarin mafi karancin albashin cikin mako guda.
Ministan, ya ce daga cikin umarnin da Tinubu ya bayar, har da bukatar ganin wakilan bangarorin biyu sun amince da kudin da ‘yan Nijeriya za su gamsu da shi, Wanda kuma gwamnati da kamfanoni masu zaman kansu za su iya biya ba tare da fuskantar matsala ba.
Idan ba a manta ba kungiyoyin kwadago na NLC da TUC sun shiga yajin aiki a ranar Litinin kan neman a kara mafi karancin albashin ma’aikata.
A ranar Talata suka tsagaita da yajin aikin domin ci gaba da tattaunawa da gwamnatin tarayya da nufin nemo mafita.
A wani labarin na daban kamfanin dillancin labaran Nijeriya (NAN), ya ruwaito cewa mutane 30 ne, suka makale cikin ramin da ake hakar ma’adanai da kamfanin African Minerals and Logistics Ltd ke aiki.
NAN ya kara da cewa, Alhaji Abdullahi Arah, Darakta-Janar na Hukumar Bayar da Agajin Gaggawa na Jihar Neja (NSEMA), ya ce lamarin ya faru ne sakamakon mamakon ruwan sama.
Ministan ya ce kokarin da gwamnatin tarayya ke yi ya nuna yadda ta himmatu wajen ganin an dakile asarar rayuka, da kuma ceto wadanda suka makale.
“Da samun labarin faruwar lamarin, sai muka tura jami’an kula da ma’adanai na tarayya (FMO) da jami’an hukumar binciken ma’adanai wajen.
“Tare da hadin gwiwar kamfanin hakar ma’adanai, mun ceto mutane bakwai da suka makale. Ana ci gaba da gudanar da aikin ceto a wajen,” in ji shi.
DUBA NAN: Alkalin Alkalan Najeriya Ya Kira Alkalai Guda Biyu Da Sukayi Shari’ar Masarautu A Kano
Ya kuma bai wa ‘yan Nijeriya tabbacin gwamnatin tarayya ta kuduri aniyar yin bincike kan musabbabin afkuwar lamarin.
