Sabon Gwamnan jihar Kano, Abba Kabir Yusuf a ranar Litinin ya sha alwashin sake bude shari’ar zargin kisan da ake yi wa shugaban masu rinjaye na majalisar wakilai, Alhassan Ado Doguwa.
Idan dai za a iya tunawa dai a makon da ya gabata ne tsohon babban Lauyan jihar kuma kwamishinan shari’a na jihar, Musa Lawan ya bayyana cewa, gwamnatin jihar ta wanke Alhassan Ado Doguwa kan duk wasu tuhume-tuhumen da suka shafi kisan kai da kone-kone da ake yi masa.
A baya dai, an kama Alhassan Doguwa, tare da gurfanar da shi a gaban kotu bisa zarginsa da bayar da umarni da kuma hannu a cikin zargin kashe mutane kusan 15 da aka yi a zaben shugaban kasa/Majalisar Tarayya da aka gudanar a ranar 25 ga watan Fabrairu a Tudun wada – daya daga cikin kananan hukumomin biyu na mazabar da yake wakilta a majalisar tarayya da suka hada da Doguwa/Tudunwada. Sai dai, Doguwa Ya musanta wannan zargi da kakkausar murya.
A jawabinsa na farko bayan rantsar da shi, Gwamna Abba Kabir Yusuf ya ce zai duba lamarin da kuma sauran laifukan zabe da aka tafka a cikin shekaru takwas na gwamnatin Abdullahi Umar Ganduje.
A wani labarin na daban yau Talata ne shugaban kasa Bola Tinubu ya fara aikinsa a fadar shugaban kasa, lamarin da ke nuni da cewa wa’adinsa ya fara aiki.Z
Tawagar shugaban kasar ta isa fadar gwamnatin tarayya da misalin karfe 2:35 na yammacin ranar Talata.
Da isowarsa, shugaba Tinubu ya dan dakata a kofar shiga domin duba jami’an tsaro, inda ya tattauna da su kafin ya shiga cikin fadar gwamnatin.
Fitattun mutanen da suka halarci tarbar shugaban kasar sun hada da mataimakin shugaban kasa Kashim Shettima; Gwamnan Babban Bankin Nijeriya (CBN), Godwin Emefiele; Shugaban Kamfanin Man Fetur na Kasa (NNPC) Mele Kyari, da Dele Alake da James Faleke.
