Ana tuhumar kimanin mutun 1,000 da aka kama a Kano da laifin hada baki, sata, yin taro ba bisa ka’ida ba, tada tarzoma, cin zarafi, lalata ta hanyar wuta da kuma lalata kadarorin gwamnati yayin zanga-zangar #EndBadGovernance.
A ranar Talata kotun Amobile da ke Kano ta bayar da umarnin a tsare masu zanga-zanga 632 bisa zargin lalata kadarorin gwamnati yayin zanga-zangar #EndBadGovernance.
Ana tuhumar wadanda aka kama da laifin hada baki, sata, yin taro ba bisa ka’ida ba, tada tarzoma, cin zarafi da kuma lalata ta hanyar wuta.
Manyan jami’an shari’a uku ne suka jagoranci zaman kotun da suka hada da babban alkalin kotun, Ibrahim Mansur-Yola, babbar majistire Hadiza Rabiu-Bello, da kuma babban alkalin kotun Abba Muttaka-Dandogo.
Kotun ta dage zaman har sai ranar 19 ga watan Agusta domin sauraren karar.
Tun da farko, daraktan masu shigar da kara na jihar (DPP), Salisu Tahir, ya shaidawa kotun cewa wadanda ake tuhumar sun aikata laifukan ne a ranar 1 ga watan Agusta.
Duba nan: Abba Kabir Ya Bayyana Damuwa Kan Yadda Ya Samu Wasu Hukumomi
Ya yi zargin cewa a wannan ranar ne wadanda ake tuhumar a lokacin zanga-zangar #EndBadGovernance a fadin kasar suka yi kutse tare da lalata dukiyoyin gwamnati da na jama’a a Kano.
“Wadanda ake tuhumar sun shiga cikin shagunan mutane sun yi awon gaba da kayayyakinsu,” in ji DPP a kotun.
Mai gabatar da kara ya ce laifukan sun ci karo da sashe na 97, 287, 229, 336, 349 da 247 na kundin laifuffuka.
Yayin da wasu wadanda ake tuhumar suka amsa laifinsu, wasu kuma sun ki amsa laifin.
Da yake magana da manema labarai bayan zaman kotun, babban lauyan gwamnatin Kano, Haruna Isa-Dederi, ya ce gwamnati ta kafa kotunan tafi da gidanka guda uku domin gurfanar da wadanda ake tuhuma.
Mista Isa-Dederi ya ce: “Na roki alkalin alkalan jihar Kano da ya ba da damar kundin tsarin mulki na kotunan musamman guda uku a harabar rundunar ‘yan sandan jihar saboda yawan wadanda ake tuhuma da hannu a ciki.”
Mista Isa-Dederi ya ce za a yi nazari kan kundin shari’ar, kuma ma’aikatar shari’a za ta ba da shawarwarin da suka dace kafin ranar da za a dage sauraron karar.
