Amanar Kasar Faransa A Cinikin Jirgin Ruwa- Von der Leyen

Man fetur ya fado bayan harin da Isra’ila ta kai wa Iran

Kashi 43 cikin 100 na Al’ummar Duniya ba su da damar shiga Intanet

Shugabar Kungiyar Tarayyar Turai Ursula Von der Leyen ta ce sam ba a yi wa Faransa adalci ba kuma an ci amanar ta, a batun cinikayyar jirgin ruwan karkashin teku da ta kulla da Australia, tana mai jadadda cewa hakan tamkar cin amana ne.

Tun makon da ya gabata ne, cacar-baka ta barke tsakanin Faransa da Amurka sakamakon yadda Faransar ke zargin Amurka da yi mata kutungwila gami da cin amanar ta wajen kwace cinikayyar jirgin karkashin tekun.

A cewar Ursula Von der Leyen Tarayyar Turai ba za ta amince a yi wa wata mambarta makamancin wannan cin amanar ba.

Tun da fari dai Faransa ce ta kulla yarjejeniya da kasar Australia wajen sayar mata da jirgin ruwan karkashin teku, amma kwatsam sai labarin janye yarjejeniyar ya bulla.

Australia ta sanar da janye yarjejeniyar da ta kulla da Faransa, bayan da tuni Faransan ma ta fara aikin samar da jirgin, abinda ta ce ba mai sabuwa ba ne.

Bayan da Australia ta janye yarjejeniyar ta kuma kulla makamanciyar ta da Amurka, abin da tarayyar Turai ta ce karara cin dunduniyar Faransa ne da kuma yi mata zagon kasa.

Sai dai tuni shugaban kasar Amurka Joe Biden ya bukaci tattaunawa da na Faransa don shawo kan lamarin, da ka iya wargaza alakar su.

A wani labarin na daban yau ta ke ranar zaman lafiya ta duniya da Majalisar Dinkin Duniya ta tsaida domin jaddada manufofin tabbatar da kwanciyar hankali, gami da kawo karshen rikice-rikice, inda ake shafe akalla sa’o’i 24, cikin tsagaita wutar dukkanin tashe-tashen hankulan da ake ciki.

Taken ranar ta yau dai shi ne, tabbatar da murmurewar duniya daga matsalolin da suka addabe ta.

Cikin sanarwar da ta fitar dangane da ranar ta yau, Majalisar Dinkin Duniya ta ce, ya zama dole hukumomi da kungiyoyi suka ci gaba da mutunta dukkanin yarjeniyoyin tsagaita wutar rikice-rikicen da aka kulla a sassan duniya, domin baiwa mutanen da tashe-tashen hankula suka rutsa da su damar samun taimakon da suke bukata, na abinci, da magunguna musamman ma alluran rigakafi cutuka, a daidai lokacin da har yanzu ake fama da annobar Korona.

Majalisar dinkin duniyar ta kuma koka kan cewar, duk da annobar ta Korona ta fi yiwa yankunan marasa karfi illa, fiye da kasashe marasa karfi 100 ne suka rasa samun ko da kaso kalilan daga cikin alluran rigakafin cutar sama da miliyan 687 da kasashe masu arziki suka baiwa al’ummominsu, kamar yadda kididdiga ta nuna a watan Afrilun da ya gabata.

A bangaren muhalli kuwa sakataren Majalisar Dinkin Duniya Antonio Guterres ya bukaci daukar matakan zaman lafiya tsakanin dan adam da yanayin muhallin sa, domin kuwa matsalar canjin yanayi ba ta dakata ba, duk da takaita walwalar jama’a, da kuma durkusar da tattalin arzikin kasashe da annobar Korona ta janyo.