Shugaban kasar Sin Xi Jinping da uwargidansa Peng Liyuan, sun aike da sakon taya murna a yau Asabar, ga Sarki Charles na III da Sarauniya Camilla kan tabbatar da nadinsu a hukumance.
A sakon nasu, Xi da Peng sun ce duniya na fuskantar manyan sauye-sauye masu sarkakiya, kuma kasa da kasa na fuskantar kalubalen da ba a taba ganin irinsu ba.
Sun kara da cewa, a matsayinsu na mambobin dindindin a Kwamitin Sulhu na MDD, ya kamata Sin da Birtaniya, su hada hannu wajen inganta yanayin da ake ciki na rungumar zaman lafiya da ci gaba da cin moriyar juna.
A cewarsu, a shirye Sin take ta hada hannu da Birtaniya wajen inganta abota tsakanin al’ummunsu, da fadada hadin gwiwar moriyar juna da zurfafa mu’amala da musayar al’adu tsakanin jama’arsu ta yadda kasashen biyu da duniya baki daya, za su amfana da dangantaka mai karko da alfanu.
A yau Asabar aka tabbatar da nadin Sarki Charles na III a matsayin Sarkin Ingila a hukumance, yayin wani kasaitaccen biki da ba a ga irinsa ba cikin shekaru 70.(Fa’iza Mustapha)
Shugaban hukumar kwallon kafa ta duniya Fifa, Gianni Infantino ya yi barazanar kin nuna gasar kofin duniya ta mata ga wasu kasashen Turai biyar, matakin da ya kawo cece-kuce a duniya.
Infantino ya bukaci kasashen da cewar sai idan kamfanonin da za su haska gasar a talabijin sun kara kudin tayin da suka yi tun farko kuma shugaban ya ce abin da takaici kan kudin da aka yi tayin tallata wasannin a Burtaniya da Sifaniya da Italiya da Jamus da kuma Faransa.
Ya kara da cewar an watsa wa ‘yan wasa da kwallon kafar mata kasa a ido, kuma manyan kasashen turai na shirin kawo koma baya a gasar wanda hakan abin takaici ne babba.
Za’a buga gasar kofin duniya ta mata a Australia da New Zealand da za’a fara ranar 20 ga watan Yulin wannan shekarar ta 2023 sai dai Infantino ya ce kamfanonin Turai da za su tallata gasar sun yi tayin biyan dalar Amurka miliyan daya zuwa miliyan 10 idan ka kwatanta da Dalar Amurka miliyan 100 zuwa miliyan 200 wajen tallata gasar kofin duniya ta maza.
Ya ce wannan tayin ba adalci, idan suka dage iya abin da za su biya kenan, hakan zai hana Fifa ta bayar da izinin nuna gasar a kasashen sannan ya kara da cewar dukkan kudin da za’a samu a kallon gasar ta bana za’a zuba su a fannin bunkasa kwallon kafar mata a duniya.
